ሽመት 6ይ ፓትሪያርክ ኦርቶዶክስ ተዋህዶ ኤርትራ፡ ዘይቅቡል ስነስርዓት ምኳኑ ተገሊጹ።

ኦርቶዶክስ ተዋሃዶ ቤተ ክርስትያን ኤርትራ፡ ሰንበት 26 ጥሪ 2025 ኣብ ቤተ ክርስትያን ርእሰ ኣድባራት ደብረ-ጽዮን ቅድስት ማርያም ኣብ ዝተኻየደ ጽምብል ስርዓተ ሲመትን ጸሎተ-ተቐብኦን፡ ንብጹእ ወቅዱስ ኣቡነ ባሲሎስ መበል ሻድሻይ ፓትሪያርክ ርእሰ ሊቃነ ሃገረ ኤርትራ ገይራ ከምዝቀበአት ዛኣወጀ ጉጅለ ህግደፍ፡ ሕጂ ውን መእመና ኣብ ዘየሳተፈን ሕጊ ቤተክርስቲያን ኣብ ዘየክበረን ፖለቲካዊ ውሳነታት ኣትዩ ሽመት ምፍጻሙ፡ ንኦርቶዶክስ ተዋህዶ ቤተክርስቲያን መሳርሒ ፖለቲካ ካብ ምግባራ ከዕርፍ ከምዘይኮነ ብዘረድእ ኣገባብ፡ ንምስሊ እቲ ጉጅለ ዝመስል ዘይስርዓታዊ ቅባኣት ከምዝፈጸመ ተገሊጹ።

ጉጅለ ህግደፍ ኣብቲ ናይ ሰንበት ጽምብል ሽመት፡ ውልቀመላኪ ኢሳይያስ ኣፈወርቂ፡ ላዕለዎት ሰብ መዚ ጉጅለ ህግደፍ፡ ብዋና ጸሓፊ ማሕበር ኣብያተ ክርስትያናት ዓለም ዝተመርሐ ሰለስተ ኣባላት ዘለዎ ጉጅለ ልኡኽ፡ ፕረዚደንት ኣብያተ ክርስትያናት ኣፍሪቃ፡ ዋና ጸሓፊ ማሕበር ኣብያተ ክርስትያናት ዓበይቲ ቀላያት ቀርኒ ኣፍሪቃ፡ ካብ ግብጺ፡ ኢትዮጵያ፡ ሶርያ፡ ኣርመንያ፡ ህንዲ፡ ሩስያን ግሪኽን ዝመጹ ወከልቲ፡ መራሕቲ ሃይማኖት፡ ኣብ ኤርትራ ዝመደበሮም ዲፕሎማት፡ ካህናት፡ ወከልቲ ገዳማትን ኣድባራትን መንፈሳዊ ኮለጃትን፡ ዲያቆናትን ሊቃውንትን፡ ኣባላት ቅዱስ ሲኖዶስ፡ መራሕቲ ስራሕ ሊቃነ ካህናት ሃገረ ስብከታት ውሽጥን ወጻእን ወከልቲ ዓበይቲ ዓድን ኣብ ዝተረክብሉ፡ ንብጹእ ወቅዱስ ኣቡነ ባሲሎስ 6ይ ፓትሪያርክ ርእሰ ሊቃነ ሃገረ ኤርትራ ጌሩ ከምዝሸመ ብወግዒ ዛኣወጀ ኮይኑ፡ ይኩን እምበር እቲ ዝተካየደ ሽመት ንሕጊ እታ ቤተክርስቲያ ዘየክበረ ብምኳኑ ብዙሕ ስምዒታት ምፍጣሩ”ዩ ዝግለጽ።

ብጹእ ወቅዱስ ኣቡነ ባሲሎስ፡ ኣብ እዋን ማእሰርቲ ብጹእ ወቅዱስ ኣቡነ ኣንጦንዮስ፡ ብቃሎም ንማእሰርቲ ኣቡነ ኣንጦንየስ ዝደገፉን፡ “ንኦርቶዶክስ ክሒዶም”ዮም፡ ተለሚኖም ውን ኣብዮም”ዮም” ብምባል ኣብ ልዕሊ ኣቡነ ኣንጠንዮስ ቃለ ክሕደት ዝሃቡን፡ ኣብ ሕግታት ጉጅለ ህግደፍ ብዘለዎም ተማእዛዝነት ብጉጅለ ህግደፍ ዝተሓርዩን ክንሶም፡ መእመና ኣብዘይመረጸሉ መድረክ፡ ሽመት ፓትሪያርክ ምቅባሎም፡ እቲ ዝተካየደ ስነስርዓት ህግደፍ ኣብ ሃይማኖታውያን ትካላት ንዘለዉ ምትእትታው ኣጉሉሑ ዘርእን፡ ንምስሊ እቲ ጉጅለ ዝመስልን ዘይወግዓዊ ስነስርዓት ኮይኑ ብምክያዱ፡ ኣብ ህዝቢ ቁጥዐ ምፍጣሩ”ዩ ዝግለጽ።