ህግደፍ ብመንገዲ ኤምባሲኡ ኣቢሉ ደላይ ሰላም ምኳኑ ከረድእ ይፍትን

ኣብ ኣዲስ ኣበባ ዝርከብ ኤምባሲ ጉጅለ ህግደፍ፡ ምርጫ ናይቲ ዝውክሎ ጉጅለ ኣብ’ዚ ዞባ ቀርኒ ኣፍሪቃ ሰላምን ምርግጋእን ምፍጣር ጥራሕ ምኳኑ፡ ኣብቲ ንባይታዊ ሓቅታት ክጎሲ ዝፈተነን፡ ምህለላ ኲናት ኣብ ትሕቲ ዝብል ኣርእስቲ ዝተጻሕፈን ናይ facebook ጽሑፍ ገሊጹ።

ኣብዚ ቅንያት እዚ ኲናት ዘይተርፍ ምኳኑ፡ ጸቕጢ እንተዘይተገይሩ ካርታ ምብራቕ ኣፍሪቃ ክቕይር ዝኽእል ኣዕናዊ ኲናት ኣብ ቀረባ ግዜ ክባራዕ ከምዝክእል፡  ማሕበረሰብ ዓለምን ሓያላን ሃገራትን ውን ንምዕጋቱ ክጓየዩ ኣለወን” ዝድርሳኑ ምህለላ ኲናት፡ ኣእዛን ደላዪ ሰላም ህዝቢ ኣደንቊሩ ኣሎ ዝበለ መግለጺ ኤምባሲ ጉጅለ ህግደፍ፡ ዝዓርግ ዘሎ ምህለላ ኲናት፡ ከም ወትሩ ውጹእ ሓሶታት ኣሰንዩ ስም ኤርትራ ከልዕል ይስማዕ ኣሎ ብምባል”ዩ፡ ነቲ ጉጅለ ህግደፍ ከመሓድሮ ዝህንደደሉ ዘሎ ናይ ኲናት ሃዋሁ  ክኽውል ዝፍትን።

ሰራዊት ኤርትራ መሬት ትግራይ ሒዙ ኣሎ፡ ኤርትራ ስምምዕ ፕሪቶርያ ስለዘይማእምኣ ንምፍሻሉ ኲናት ክትውልዕ ትኽእል እያ፡ ሓደ ወገን ህወሓት ምስ ኤርትራ ወጊኑ ኣሎ፡ ኤርትራ ንፋኖ ትሕግዞም ኣላ፡ ብድሕሪ ኤርትራ ግብጺ፡ ስዑድያ ኣለዋ፡ እቲ ሃለውልው መወዳእታ ዘይብሉ ኢሉ ዝቅጽል መግለጺ ኤምባሲ፡ ጉጅለ ህግደፍ ኣብ ዞባ ቀርኒ ኣፍሪቃ ብግህዱን ስውርን  ንዝገብሮም ናይ ዕግርግር ተግባራት ሸፋፊኑ፡ ምርጫና ሰላም”ዩ ክብል ምፍታኑ፡ መቀጸልታ ናይቲ ንምስሊ ጉጅለ ህግደፍ ከጻዕዱ ዝሃልክ ዘሎ ባይታዊ ሓቂ ዝከሓደ ትረካታትን ምኳን”ዩ  ዘረጋግጽ።

ህዝቢ ኤርትራ ጸጋታት መሬት፡ ባሕርን ደሴታትን ኣብዚሑ ዝተዓደለን፡ ዘይናቱ ብሂጉን ጠሚቱን ዘይፈልጥ ህዝቢ”ዩ ክብል፡ ነቲ ምስ ኩሉ ጸጋታቱ ኣብ ዓዘቅቲ ድክነት ክነብር ዝተፈርደ ህዝቢ ኤርትራ ዝጠቀሰ ኤምባሲ ጉጅለ ህግደፍ፡ ህዝቢ ኤርትራ ኣብ ታሪኹ፡ ተወሪሩ እምበር ወሪሩ ዝብል ጽያፍ ዛንታ ዘይብሉ ምኳኑ”ኳ እንተጠቀሰ፡ ነቲ ህዝቢ ኤርትራ ብሰንኪ ጉጅለ ህግደፍ ኣብ ታሪኹ ንፈለማ እዋን ዝተሰከሞ ወራሪ ዝብል ጽያፍ ግን ክጠቅሶ ወይ ክቅበሎ ኣይተሰምዐን።

ንቃላት ውልቀመላኪ ኢሰያስ ከም መወከሲ ጠቂሱ፡ ዘይናትና ኣይንደልን ናትና ውን ኣይንህብን ዝበለ ኤምባሲ ጉጅለ ህግደፍ ኣብ ኣዲስ ኣበባ፡ ድሕሪ”ቲ ኣብ ትግራይ ዝተፈጸመ ኣስካሕካሒ ኲናት፡ ኤርትራ ካብቲ ብብይን ኮምሽን ዶብ ዝተሓንጸጸን ዝተመልከተን፡ ኣብ ካርታ ዓለም ዝሰፈረን ኣህጉራዊ ዶብ ወጻኢ፡ ዝሓዘቶ ናይ ዝኾነ ይኹን ወገን ስድሪ መሬት የለን ምባሉ፡ ነቲ ብውዕል ኣልጀርስ ምስ ኢትዮጵያ ተሰማሚዐ ኢሉ ከብቅዕ፡ ኲናት ንከመሓድር ናብ መሬት ትግራይ ኣትዩ፡ ሚሊዮናት ኣሽሓት መንእሰያት ዝበልዐ ጉጅለ ህግደፍ ብናይ ሓሶት ቃላት ከጻዕዱ ዝተጻሕፈ ባይታዊ ሓቂ ዘይብሉ መግለጺ ምኳኑ”ዩ ዘነጽር።

ኤርትራ ኣብ ውሽጣዊ ጉዳይ ሃገራት ዞባ ቀርኒ ኣፍሪቃ ጣልቃ ኣትያ፡ ንሓደ ወገን ደጊፋ ነቲ ካልእ ከተጥቅዕ ረብሓ ኮነ ድልየትን ሸውሃትን የብላን ብምባል፡ ንኣብ ባይታ ዘሎ ሓቅታት ብዓይኒ ዕሙት ክኽሕድ ዝፍትን ኤምባሲ ጉጅለ ህግደፍ፡ ከም ውዕል ፕሪቶርያ ዝኣመሰለ ስምምዓት፡ ንሰብ ጉዳይ እምበር ብቐጥታ ንኤርትራ ዝምልከት ስለዘይኮነ፡ ባህጊን ተገዳስነትን ጻዕርን ኤርትራ፡ ናብ ሰላምን ርግኣትን ህዝብታት ዞባና ዝቐንዐ ጥራይ እዩ ብምባል”ዩ ንናይ ኣደባባይ ምስጢር ክዓብጥ ዝፍትን።