ኣብ’ዚ ሰሙን እዚ፡ ሰብ መዚ ጸጥታን ፖሊስን ሊቢያ ኣብ ልዕሊ ጸለምቲ ኣፍሪቃውያን ብዘውርድዎ ዘለዉ ሃስያን በደላትን፡ ኩነታት ናይቶም ብመንገዲ ማእከላይ ባሕሪ ናብ ኤውሮጳ ንምስጋር ኣብታ ሃገር ዝርከቡ ኤርትራውያን ስደተኛታት ኣብ ኣሰካፊ ደረጃ ምህላዉ ተገሊጹ።
ሰብ መዚ ጸጥታን ፖሊስን ሊቢያ፡ ዓመታዊ ኣብ ግዚያት ሮሞዳን ኣብ ልዕሊ ጸለምቲ ኣፍሪቃውያን ስደተኛታት ዘነጻጸረ ግፍዕን በደላትን ከምዝፍጽሙ ካብ ግዳያት ስደተኛታት ዝረኸብናዮ ሓበሬታ ዘረደአ ኮይኑ፡ ናብ ሃገራት ኤውሮጳ ንምስጋር ኣብታ ሃገር ዝርከቡ ስደተኛታት ንቁጠባ እታ ሃገር ይጸልዉ ኣለዉ ብዝብል ምስምስ ጥራሕ፡ መዓልታዊ በደላት ይበጽሖም ምህላዉን፡ ኣደዳ ማእሰርትን መግረፍትን ክኾኑ ተፈሪዶም ከምዝርከቡን ውን”ዩ እቲ ንማሕበራዊ ሚዲያ ብሒቱ ዝርከብ ሓበሬታ ዘረድእ።
ኤርትራውያን ስደተኛታት ካብቶም ኣብ ሊቢያ ዝርከቡ ኣፍሪቃውያን ስደተኛታት ብቁጽሪ ብርክት ዝበሉ ምኳኖም ዝፍለጥ ኮይኑ፡ ኣብዚ ሳልስቲ ሰብ መዚ እታ ሃገር ብዝገብርዎ ዘለዉ ዘይሓላፍነታዊ ተግባራት ውን ዝያዳ ተጎዲኦምን ንሓደጋ ተቃሊዖም ምህላዎምን”ዩ ዝንገር።
ሰብ መዚ ፖሊስን ጸጥታን ሊቢያ ዓመት መጸ ኣብ ልዕሊ ስደተኛታት ዝክተልዎ ዘለዉ ኣታሕዛ፡ ንሰባኣዊ መሰል ዜጋታትን መሰል ስደተኛታትን ዝጻረር ኢሰባኣዊ ተግባራት ምኳኑ ዝጠቀሱ እቶም ስደተኛታት፡ ኣብ መላእ ዓለም ዝርከቡ ተቃለስቲ ንፍትሒ ድምጾም ከስምዑን፡ ዝበጽሖም ዘሎ ኣደራዕ ንማሕበረሰብ ዓለም ክነግሩን ተላብዮም።
