ክፍሊ ዲፕሎማሲ ዓለምለኸ ይኣክል ኣብ ጉዳይ ስደተኛታት ንዘሎ ስምዕታ ናብ መንግስቲ ኢትዮጵያ ኣቅሪቡ። 

ክፍሊ ዲፕሎማሲ ዓለምለኸ ምንቅስቃስ ይኣክል፡ ብመንገዲ መንእሰይ ተቃላሳይ ኣብርሃም ተስፋይ ዝተበገሰን ኣብ ኢትዮጵያ ኣብ ልዕሊ ዝርከቡ ዜጋታትና ንዝወርድ ዘሎ በደላት ዝገልጽን ናይ ስምዕታ ደብዳበ ብውክልና ኢሰያስ ተወልደ፡  ኣለም ጎይትኦም፡
ፊሊጶስ በርሀን  ዓወት ጽሃየን ኣቢሉ፡ ኣብ ዋሽንግተን ናብ ዝርከብ ኤምባሲ ኢትዮጵያ ከምዘብጸሐ ተገሊጹ።

ክፍሊ ዲፕሎማሲ ዓለምለኸ ይኣክል ህጹጽ ስክፍታ ምጥፋእን ምእሳርን ኤርትራውያን ስደተኛታት ኣብ ኢትዮጵያ ዝብል ኣርእስቲ ኣሰንዩ፡ ናብ ኣምባሳደር ኢትዮጵያ ኣብ ሕብራት መንግስታት ኣሜሪካ ኣብ ዝጸሓፎ መልእክቲ፡ ኣብ ወሰናስን ዶባት፡ ክልላትን ዓበይቲ ከተማታትን ኢትዮጵያ፡ ብዓቢኡ ከኣ ኣብ ከተማ ኣዲስ ኣበባ፡ ኤርትራውያን ስደተኛታት ይስወሩን ይጠፉኡን ምህላዎም ዘረድእ፡ ኣዚዩ ዘሰክፍ ጸብጻባት ይበዝሕ ብምህላዉ ዓሚቝ ስክፍታ ንምግላጽ ዝተጻሕፈ መልእክቲ ዝሓዘ ኢዩ ።

ኢትዮጵያ ንኣህጉራዊ ስምምዓት ተቀቢላ፡ ዘይሕጋዊ ባርነትን ምስግጋር ደቂ ሰባት ንምምካት ዝቃለስ ተወፋይነት እኳ እንተሃለዋ፡ ንሽግራት ተቓላዕቲ ኮይኖም ዝርከቡ ስደተኛታት ኣብ ምክልኻል ግን እኹል ስራሕ ኣብ ምስራሕ ከምዘየላን ኣብታ ሃገር ብዙሕ ግህሰት ሰባኣዊ መሰላት ኣብ ልዕሊ ስደተኛታት ይረአ ምህላዉን ብምጥቃስ”ዩ ዝገልጽ።

ኣብ ዝሓለፈ ኣዋርሕ ጥራሕ፡ ኣብ ከተማ ኣዲስ ኣበባ ብርክት ዝበሉ ኤርትራውያን ስደተኛታት ከምዝተኣስሩን ገና ውን ኣብ ማእሰርቲ ከምዘለዉን ዝገልጽ፡ ብዙሕ ተኣማንነት ዘለዎ ጸብጻባት ከምዝቐረበን፡ እቲ ተፈጢሩ ዘሎ ኩነታት፡ ምስቲ ኣብ ኲናት 98 ዘጋጠመ ጃምላዊ ምስጓግ ዝመሳሰል ስጋኣት ብምፍጣሩ፡ ብዙሓት ስደተኛታት ናብ ዘይተመደበ ዝተናውሐ ስደት ክጓዓዙ ይፈርዶም ምህላዉ  ክፍሊ ዲፕሎማሲ ዓለምለኸ ይኣክል ኣረዲኡ።፡

ኣብ ኢትዮጵያ ብሕጋዊ መንገዲ ዝነብሩ ሓዊሱ ብኣማኢት ዝቑጸሩ ኤርትራውያን ስደተኛታት ብዘይ ግቡእ መስርሕ ተኣሲሮም ከምዘለዉን፡ ንኣዋርሕ ተኣሲሮም ክጸንሑ ዝተገደዱ ምህላዎምን  ብምጥቃስ፡ ነቶም ብዘይ ዝኮነ ኣሰር ዝጠፉኡን ሂወቶም ዝሰኣኑን ሓዊስካ ሂወት ኤርትራውያን ስደተኛታት ኣብ ኢትዮጵያ ናብ ኣሰካፊ ደረጃ ምውራዱ”ዩ ስምዕቱኡ ኣቅሪቡ።

ካብዚ ብዝሓለፈ ኣብ ክልል ኣምሓራ ኣብ ዝርከብ መዓስከር ኣለምዋች ዝነብሩ ኤርትራውያን ስደተኛታት፡ ተደጋጋሚ ግዜ ግዳይ ስርቂ፡ ጭውያ፡ ዓመጽን መጥቃዕቲ ዕጡቃት ጉጅለታትን ይኮኑ ምህላዎም ዘረደአ ክፍሊ ዲፕሎማሲ ዓለምለኸ ይኣክል፡ ገንዘብን ንብረትን ንምዝራፍ ብዝንቀሳቀሱ ጉጅለታት፡ ኣብ ልዕሊ ስደተኛታት ብዝተፈጸመ ናይ ጥይትን ካራን መጥቃዕቲ፡  ኣብ ውሽጢ ሓደ ዓመት ጥራሕ ልዕሊ 9ስደተኛታት ናይ ሞት ሓደጋ ከምዝበጽሖምን፡ ብሰንኪ”ዚ ዘስካሕክሕ ፍጻሜታት፡ ድሕነትን ሃለዋትን ናይቶም ካብ ባርነትን ግዱድ ወተሃደራዊ ዕስክርንናን ሃዲሞም ኣብ ትሕቲ ዕቝባ ዝነብሩ ዘለዉ ኤርትራውያን ስደተኛታት ኣብ ከቢድ ሓደጋ ምውዳቁ ብምግላጽ፡ መንግስቲ ኢትዮጵያ ሓላፍነቱ ክዋጻእ”ዮም ስምዕቶኦም ኣቅሪቦም።

መንግስቲ ኢትዮጵያ ንኣህጉራዊ ውዕላት ኣክቢሩ፡ ኤርትራውያን ስደተኛታት ብሰላም ናይ ምንባር መሰሎም ክሕሉን፡ መጋበርያ ፖለቲካዊ ስምዒታት ካብ ምኳን ክኸላኸለሎምን ግዴታ ከምዘለዎ ዝጠቀሰ ክፍሊ ዲፕሎማሲ ዓለምለኸ ይኣክል፡ መንግስቲ ኢትዮጵያ ምእሳርን ምጭዋይን ኤርትራውያን ስደተኛታት ደው ከብል፡ ሃለዋት ኣብ ማእሰርቲ ህይወቶም ዝጠፈአ ዜጋታት ክንገር፡ ከሙኡ ውን ናይቶም ኣብ ወርሒ ጥሪ ብ ፖሊስ ታ ሃገር ዝተቀትሉ ሬሶኦም ናብ ስድርኦም ክበጽሕ ፡ኣብ ኢትዮጵያ ናይ ምንባር መሰሎም ክሕሉን፡ ሕጋዊ መንበሪ ፍቃድ ክህብን ብምጽዋዕ”ዩ ቅሬቱኡን ስምዕቱኡን ናብ ኤምባሲ ኢትዮጵያ ኣቅሪቡ።

ኣብ መደምደምታ፡ ኤምባሲ ኢትዮጵያ ኣብ ሕቡራት ሃገራት ንሕቶን ስምዕታን ክፍሊ ዲፕሎማሲ ዓለምለኸ ይኣክል ብክብሪ ከምዝተቀበለን፡ ንዘሎ ቅሬታ ኤርትራውያን ኣብ ጉዳይ ስደተኛታት ውን ናብ መንግስቲ ብልጽግና ከብጽሖ ምኳኑን ቃል ብምእታው ከምዘፋነዎም፡ ዝረከብናዮ ሓበሬታ ወሲኩ የረድእ።