ንሉኡላውነት ኤርትራን ሕቶ ባሕሪ ኢትዮጵያን ዝድህስስ መጽናዕታዊ መደብ ብምሁራን ዜጋታት ቀሪቡ።

ማሕበረሰብ ኤርትራውያን ምሁራን ትማሊ ኣማሲዩኡ ኣብ ናይ ቃልሲ ሜዲያታት ቀሪቦም፡ ንሉኡላአነት ኤርትራን ሕቶ ባሕሪ ኢትዮጵያን ዝድህስስን፡ ብቋንቋታት ትግርኛ ኣምሓረኛ ዓረብን ኢንግልሽን ዝተዳለወ መጽናዕታዊ ጽሑፍ ኣቅሪቦም።

ብ13 ጥቅምቲ 2023፡ ቀዳማይ ሚኒስተር ኢትዮጵያ፡ ዶክተር ኣብይ ኣሕመድ፡ ንፓርላማ ሃገሩ ኣብ ዘስምዖ መደረ፡ ቀይሕ ባሕሪ “ባህርያዊ ዶብ ኢትዮጵያዩ” ክብል ምዝራቡን፡ ሃገሩ ዋንነት ቀይሕ ባሕሪ ክህልዋ “ናይ ምህላውን ዘይምህላውን ጉዳይዩ” ክብል ምግላጹን፡ ብዛዕባ ናይ ኢትዮጵያ ዋንነት ቀይሕ ባሕርን ተጠቃምነት ኣፍደገ ባሕርን ኣመልኪቱ ዘቕረቦ ምጉትን፡ ዋላ ውን ንሱ ኣብ ስልጣን ከሎ ከተግብሮ እንተዘይከኣለ፡ ዝመጽኡ ወለዶታት ንዋንነት ቀይሕ ባሕሪ፡ ክውን ክገብርዎ ምዃኖም ምንባዩ፡ ልክዕ ከም ብሰዓት እትቈጻጸሮ ነታጒ፡ ንዝመጽኡ ወለዶታት ዕዳ ገዲፉሎም ይሓልፍ ምህላዉ ዝገለጹ ኮይኖም፡ ንናጽነት፡ ሉኡላውነት፡ ግዛኣታዊ ሓድነት ኤርትራን፡ ካሎኦት ሃገራት ቀይሕ ባሕርን ኣብ ሓደጋ ዘእቱን፡ ዞባዊ ህውከት ዘከትልን ምኳኑ ብምጥቃስ፡ መደረ እቲ ቀዳማይ ሚኒስተር ወድዓዊ ዘይምኳኑ ገሊጾም ።

ኣብቲ ንታሪክ፡ ጆግራፍ፡ ዲሞግራፊ ኤትኒክዊ ዝምድናታትን፡ ዓለምለካዊ ሕጊ ባሕርን መሰረት ጌሩ ዝቀረበ ኮንፈረንስ፡ ንመግዛእታዊ ውዕላት ዶባት ዘፍረሰ ጎበጣ ስርዓታት ኢትዮጵያን፡ ድሕሪ ዕጥቃዊ ቃልሲ ዝተረጋገጸን፡ ብረፈረንደም ወግዓውነት ዝለበሰን ናጽነት ኤርትራ፡ ምስ ኢትዮጵያ ዓለምለካዊ ኣፍልጦ ዘለዎ ንጹር ዶባት ምህላዉ ብምንጻር፡ ኢትዮጵያ ኪንዮ”ቲ ንዓለምለካዊ ሕግታት ዘክበረ ሕጋዊ ተጠቃምነት ባሕሪ፡ ንጎበጣ ናይ ሓይሊ ስጉምት ዘውሕስ ሕጊ ስለዘየለ፡ ሕቶ እቲ ቀዳማይ ሚኒስተር ተቀባልነት ክህልዎ ከምዘይኮነ”ዮም ዝሰማምዑ።

ኣብ ሞንጎ ኢትዮጵያን ኤርትራን ተፈጢሩ ዘሎ ክልተኣዊ ምትኩታኽ፡ ወላ”ኳ ብሽፋን ባሕሪ ተጎልቢቡ ይሃሉ ዳኣ እምበር፡ ስርዓታት ብልጽግናን ህግደፍን ንናይ ህላወ ሕቶ ዝፈጥርዎ ዘለዉ ምክንያት ምኳኑ ውን ብዙሓት ዝሰማምዑሉ”ዩ።