ኣስመራ ዝወዓለ ኣኬባን ስምዕታ ህግደፍን

ሚኒስተር ጉዳያት ወጻኢ ጉጅለ ህግደፍ ዝኮነ ኣቶ ዑስማን ሳልሕ፡ ትማሊ ኣብ ኤርትራ ንዝርከቡ ቀወምቲ ኣምባሳደራትን ንዲፕሎማሰኛታት ዓለምን ኣብ ዝሃቦ ዘይልሙድ መብርሂ፡ ጉጅለ ህግደፍ ኣብ ውሽጣዊ ጉዳያት ኢትዮጵያ ኢዱ ከምዘየእቱን፡ ናይ ኲናት ሸውሃት ከምዘይብሉን ብምግላጽ ኣብ ባይታ ንዘሎ ሓቅታት ክኽሕድ ፈቲኑ።

ነቲ ኣብ ኣስመራ ዝተካየደ ርክባት ኣመልኪቱ ኣብ ውልቃዊ ናይ ትዊተር (x) ሕሳቡ መግለጺ ዘቀመጠ ኣፈኛ እቲ ጉጅለ ዝኮነ የማነ ቻርሊ ብወገኑ “ኤርትራ ኣብ መንጎ ግዝያዊ ምምሕዳር ትግራይን ውድብ ህወሓትን ተፈጢሩ ንዘሎ ውሽጣዊ ግጭት ኢድ የብላን” ክብል ነቲ ኣብ ባይታ ዘሎ ሓቅታት ፍጹም ዝከሓደ መግለጺ ዘቀመጠ ኮይኑ፡ ነቲ ኣብዚ ቀረባ መዓልታት፡ ፕረዚደንት ግዝያዊ ምምሕዳር ኮይኑ ከገልግል ብዝጸንሐ ኣቶ ጌታቸው ረዳን ገለ ፖከቲከኛታት ትግራይን ክግለጽ ዝጸንሐ ናይ ምትኩታኽ ክስታት፡ ምሉእ ብምሉእ ሓቅነት ዝረሓቆ ምኳኑ”ዩ ከረድእ ፈቲኑ ዝርከብ።

ሰብ መዚ ፈደራላዊ መንግስቲ ኢትዮጵያ’ውን ኣብ ሞንጎ ጉጅለ ህግደፍን ገለ ክፋል ሕዋሓትን ዝግበር ዘሎ ርክባት “ጥዕና ዘይብሉ” ብምባል ክገልጽዎ ምጽንሖም ዝፍለጥ ኮይኑ፡ ኣዛዚ ሓይልታት ትግራይ ጀነራል ታደሰ ወረደ ውን ብወገኑ፡ ብወገን ላዕለዎት ኣዘዝቲ ሕዋሓት፡ ምስ ጉጅለ ህግደፍ ዝካየድ ርክብ ከምዘየለ ቅድሚ ክልተ መዓልታት ኣብ ዝሃቦ ጋዜጣዊ መግለጺ ገሊጹ ምንባሩ ዝዝከር ኮይኑ፡ ይኩን እምበር ኣብ ከባቢ ዶባት ዘለዉ ታሕተዎት ሰብመዚ 2ቲኦም ሓይልታት፡ ኣብቲ ከባቢታት ጸጥታዊ ምርግጋእ ንምውሓስ ዘይስሩዕ ርክባት ከምዝግበርን፡ ውሱን ሰላማዊ ርክባት ህዝብታት ክልቲኡ ሃገራት ከምዝካየድን ውን ክምስክር ተሰሚዑ”ዩ።

ኣቐዲሙ ምስ ሰበስልጣን ጉጅለ ህግደፍ ርክባት ይግበር ምንባሩ ዝተኣመነ ብዶ/ር ደብጽዮን ገብረሚካኤል ዝምራሕ ክፋል ህወሓት ብወገኑ፡ እቲ ዝተገብረ ርክባት “ሕቡእ” ርክብ ከምዘይኮነ ሰለማዊ ምርጫ ዘቀደመ ርክባት ምኳኑን ገሊጹ ምንባሩ ዝዝከር ኮይኑ፡ ኣቶ ጌታቸው ረዳ ብወገኑ፡ ኣብ ዶባት ክልቲኤን ሃገራት ዝኮነ ይኹን ሃገራዊ  ሰራዊት ከምዘየለን፡ ፈደራላዊ መንግስቲ ኢትዮጵያ፡ ኤርትራ ንምግታእ ሓይልታቱ ኣብ ዶባት ከዋፍር ተደጋጋሚ ግዜ ክጽውዕ ምጽንሑ ኣይርሳዕን።

ኣብቲ ናይ ኣስመራ ርክብ፡ ብወገን ኢትዮጵያ ዝቃላሕ ዘሎ “ብዲፕሎማሲ ይኹን ብወተሃደራዊ ሓይሊ” ኣፍደገ ባሕሪ ምውናን ዝብል “ግጉይ” ሸውሃት፡ ከምዘቆጠዖ ዝገለጸ ጉጅለ ህግደፍ፡ ኢትዮጵያ ንልኡላውነትን ግዝኣታዊ ሓድነትን ጎረባብታ ከተኽብር ማሕበረሰብ ዓለምን ኣገደስቲ ኣካላቱን ጸቕጢ ክገብሩላ ምሕጽንታ ዋላ”ኳ እንተቀረበ፡ ነቲ  ብገለ ክፋል ሕዋሓትን ዕጡቃት ፋኖ ናይ ክልል ኣምሓራን ኣቢሉ ኢትዮጵያ ንምርባሽ ዝገብሮ ዘሎ ናይ ኲናት ምትኩታኽ ግን ፍጹም ኣይወዓልክዎን ብምባል ክኽሕዶ”ዩ ተሰሚዑ።

ሰራዊት ኤርትራ ካብ ዶባቱ ከምዘይሰገረ ዝገለጸ ሚኒስተር ዑስማን ብተወሳኺ፡ ኣብ መስርሕ ስምምዕ ሰላም ፕሪቶርያ ኢዶም ከእትዉ ከምዘይደልዩ ንዲፕሎማሰኛታት ዓለም ብምግላጽ ጉጅለ ህግደፍ ሰላም ጥራሕ ከምዝደሊ”ዩ ከረድእ ፈቲኑ ዝርከብ።