ህግደፍ በይኑ ክዋጋእ ዓቅሚ የብሉን፡ ጌታቸው ረዳ

ንዝሓለፈ ኣስታት ክልተ ዓመታት ከም ፕረዚደንት ግዚያዊ ምምሕዳር ትግራይ ብምኳን ኣብ ስልጣን ዝጸንሐን፡ ድሕሪ”ቲ ኣብ ትግራይ ዝተፈጥረ ወጥሪ ኣብዚ ሕጂ እዋን ኣብ ኣዲስ ኣበባ ዝርከብን ኣቶ ጌታቸው ረዳ፡ ጉጅለ ህግደፍ ገዛእ ርእሱ ኪኢሉ ንኤርትራ ናብ ኲናት ክመርሓ ዓቅሚ ይኩን ድሌት ከምዘይብሉ ገሊጹ።

ኣቶ ጌታቸው ረዳ ነዚ ዝገለጸ፡ ራእዮት ሚዲያ ምስ ዝተባህለ ማዕከን ሓበሬታ ኣብ ዝገበሮ ሰፊሕ ቃለመሕተት ኮይኑ፡ ንኤርትራ ብውልቀመላኺ ምሕደሩኡ ኣብ ምግዛእ ዝርከብ ጉጅለ ህግደፍ፡ ኣብ’ዚ ሕጂ ሰዓት ርእሱ ኪኢሉ ናብ ምሉእ ኲናት ካኣቱ ይኹን ዓቅምን ድላይን ከምዘይብሉ ድሕሪ ምግላጹ፡ እቲ ጉጅለ ክገብሮ ዝህቅን ኩሉ ዓይነት ንጥፈታት ውን መሻርክቲ ኣካላት ብምፍጣር ዝረጋገጽ ጥራሕ ከምዝከውን”ዩ ገሊጹ ዝርከብ።

ኣቶ ጌታቸው ረዳ፡ ካብ ከተማ መቐለ ናብ ኣዲስ ኣበባ ድሕሪ ምእታዉ፡ ፈደራል መንግስቲ ኣብ ትግራይ ንዘሎ ፖለቲካዊ ምዕባለታት ብስቅታ ክዕዘቦ ግቡእ ከምዘይኮነ ገሊጹ ምንባሩ ዝዝከር ኮይኑ፡ ፈደራል መንግስቲ ኢትዮጵያ ልዕሊ”ቲ ኣብ ሞንጎ መራሕቲ ክልተ ወገን ሕዋሓት ዝተፈጥረ ዘይምርድዳእ፡ ተፈጢሩ ንዘሎ ፖለቲካዊ ነቃዕ ተጠቂሞም ናብ ትግራይ ዛኣትዉ ዘለዉ ናይ ደገ ሓይልታት ዝያዳ ኣተኩሮ ሂቡ ክሰርሕ ከምዝግባእ ምጽውዑ ኣይርሳዕን።

ካብ ቅድሚ 5 ኣዋርሕ ኣትሒዙ፡ ኣብ ትግራይ ዘሎ ወሰናስን ዶባት ኢትዮጵያ ክሕሉ ዝግቦኦ ሓይሊ ሰራዊት ምክልኻል፡ ኣብ ቦቱኡ ዘይምህላዉ ዝጠቀሰ ኣቶ ጌታቸው፡ ብመሰረት ኣብ ፕሪቶርያ ዝተገብረ ስምምዓት ሰራዊት ፈደራል ዶባት ኢትዮጵያ ናይ ምሕላውን፡ ኣብ ትሕቲ ናይ ደገ ሓይልታት ዝበሎም ኣካላት ዘሎ መሬት ናይ ምምላስን ግዴታ ከምዘለዎ ብምጥቃስ፡ መንግስቲ ፈደራል ንፖለቲካዊ ኩነታት ትግራይ ብኣንክሮ ክዕዘቦ ከምዝግባእ”ዩ ዝጽውዕ።

ንኤርትራ ዝመርሕ ዘሎ ጉጅለ ህግደፍ፡ ኣብ’ዚ ሰዓት ርእሱ ኪኢሉ ናብ ምሉእ ኲናት ካኣቱ ዓቅሚ ከምዘይብሉ ዝገለጸ ኣቶ ጌታቸው ረዳ፡ ይኩን እምበር ሳልሳይ ኣካል ዝዓደመ ሽግራት ክፍጠር ዘሎ ተኽእሎታት ኣብ ግምት ብምእታው ብሽርክነት ክፍጠር ንዝኽእል ኲናት መንግስቲ ፈደራል ዕድል ክህቦ ከምዘይግባእ”ዩ ዘተሓሳስብ።