ድሕሪ ስምምዕ ምቍራጽ ተጻቦኦ፡ ንኣስታት ክልተ ኣዋርሕ ዝግ ኢሉ ዝጸንሐ ደማዊ ግጭት እስራኤልን ዕጡቅ ጉጅለ ሓማስን፡ ካብ ትማሊ ኣትሒዙ ዳግማይ ከምዝተወለዐን፡ ጽዑቅ ደብዳብ ነፈርቲን መጥቃዕቲ ሮኬታትን ዝሓወሰ ግጭት ከምዝተራእየን ማዕከን ሓበሬታ CNN ገሊጹ።
ትማሊ ኣማሲዩ ኣብ ሰማያት ጋዛ ብዝተካየደ ጽዑቕ ደብዳብ ነፈርቲ እስራኤል፡ ልዕሊ 330 ሰባት ከም ዝሞቱን ብዙሓት ድማ ከም ዝቘሰሉን ምኒስትሪ ጥዕና ቃዛ ዝሓበረ ኮይኑ፡ ኣብ ሞንጎ”ቶም ግዳይ ደብዳብ ነፈርቲ እስራኤል ዝኮኑ ፍሊስጤማውያን፡ ብርክት ዝበሉ ህጻናት ከም ዝርከብዎም ውን”ዩ እቲ ምኒስትሪ ወሲኹ ዝሕብር።
ዕጡቅ ጉጅለ ሓማስ፡ እስራኤል ነቲ ውዕል ኣፍሪሳ ህይወት ኣብ መሓዩር ዝርከቡ ዜጋታታ ኣብ ሓደጋ ከም ዘእተወት ድሕሪ”ቲ ፍጻመ ኣብ ዝሃቦ ቃል ክኸስስ እንከሎ፡ እስራኤል ብወገና፡ ሓማስ ጭዉያት ኣብ ምርካብን መንጐኝነት ሰላም ኣብ ምቕባልን ምድሕርሓር ከም ዘርኣየ ብምጥቃስ፡ ትወስዶ ዘላ ስጉምቲ ዓጸፋዊ ግብረመልሲ ምኳኑ”ያ ትምጉት።
እስራኤል ነዚ መጥቓዕቲ ቅድሚ ምክያዳ፡ ምስ ኣመሪካ ከም እተማኸረት ዝገለጸ CNN፡ (White House) Karoline Leavitt, ዑጡቅ ሓይሊ ሓማስ፡ ሑቲን ካልኦትን ንእስራኤል ጥራሕ ዘይኰነ እንተላይ ንኣመሪካ ዘሸብሩ ዘለዉ ሽበራውያን ሓይልታት፡ ዓብይ ዋጋ ክኸፍሉ ምኳኖምን፡ ኩሉ ዓይነት መጥቃዕቲ ከምዝበጽሖምን” ዝገለጸ ኮይኑ፡ ሃገራት ዓረብ ነዚ ስጉምቲ ናብ ቁጥዐ ብምእታወን፡ ጋዛ ዞባዊ ወጥሪ ዳግማይ ንከይትውልዕ ስጋኣት ሰፊኑ ይርከብ።
ድሕሪ ናይ ትማሊ መጥቃዕቲ፡ ቀዳማይ ምኒስተር እስራኤል በንያሚን ናታንያሁ፡ መጥቓዕቲ ከዛይዱ ምዃኖም ዝሓበረ ኮይኑ፡ ምኒስተር ምክልኻል እስራኤል Kartz ብወገኑ እስራኤል ብወግዒ ናብ ኵናት ከም እተመልሰት ሓቢሩ ይርከብ።
