ሰራዊት ፈደራል ኢትዮጵያ ካብ ክልላት ኣምሓራን ኦሮሞን ክወጽእ እዩ

ወተሃደራዊ ኣማኻሪ ንጠቕላላኢ ሓለቓ ስታፍ ሰራዊት ፈደራል ኢትዮጵያ ዝኾነ ለተናንት ጀነራል ኣለምሼት ደግፌ ፡ምስ ወግዓዊት ማዕከን ዜና ሰራዊት እታ ሃገር ኣብ ዘቃንዖም ክልተ ተኸታተልቲ ቃለምሕትታት፡ ሰራዊት ፈደራል ካብ ክልላት ኣምሓራን ኦሮሞን ከምዝወጽን ፡ ጸጥታዊ ሓላፍነት እተን ክልልላት ናብ ኣሃዱታት ፖሊስ ኽግደፍ ምዃኑን ኣነጺሩ።

እቲ ወተሃደራዊ ኣማኺሪ ኣብ ዘረባኡ፡ ኣብ ክልላት ኣምሓራ፡ ኦሮሞን ትግራይን ወፊሩ ዘሎ ሰራዊት ፈደራል ኣብ ሓጺር እዋን ናብ መዓሰከራቱ ተመሊሱ ጉዳይ ታዕሊሙን ዕረፍቱን ከምዝገብር ጠቒሱ፡ ክልላውያን መንግስታት ኣምሓራን ኦሮሞን ንጸጥታን ዕጥቃዊ ብድሆታትን ክልለን ባዕለን ዝቘጻጸራሉ ኩነታት ከምዘድሊ እዩ ኣተንቢሁ ዘሎ።

መግለጺ ለተናንት ጀነራል ኣለምሼት ደግፌ፡ ሰራዊት ፈደራል ኣብተን ክልላት ልዕሊ 5 ዓመታት ክሃልኽ ምጽንሑ ብምሕባር፡ ሕጂ ግን ዕረፍቲ ከምዘድልዮ ምጥቃሱ፡ መንግስቲ ፈደራል እቲ ኣብ ክልላት ኣምሓራን ኦሮሞን ሰሪቱ ዘሎ ዕጥቃዊ ተቛውሞ ካብ ቊጽጹሩ ወጻኢ ኾይኑ ከምዘሎ ዘእምንዩ ይብሉ ናይ ቀረባ ተዓዘብቲ።

ኣብ ኲናት ትግራይ ብዙሕ ዝሃለኸ ሰራዊት ፈደራል፡ ኣብዚ ግዜ እዚ ነቲ ኣብ ክልል ኣምሓራ ብዕጡቓት ሓይልታት ፋኖ ዝግስግስ ዘሎ ብረታዊ ተቛውሞ ኣብ ምግታእ ይጻገምን ፡ ንዑጡቓት ሓይልታት ክልል ኦሮሞ ኣደብ ኣብ ምትሓዝ ይሽገርን ምህላዉ ክሕበር ጸኒሑ እዩ።

ለተናንት ጀነራል ኣለምሼት ደግፌ ሂብዎ ዘሎ ሓበሬታ ኣብ ባይታ እንተተመስኪሩ፡ ኣብ ክልላት ኣምሓራን ኦሮሞን ዝህሉ ጸጥታዊ ውድቀት መምለሲ ናብ ዘይብሉ ኣንፈት ከብል ምዃኑ ይግመት።
ሰራዊት ፈደራል ካብተን ክልተ ገዘፍቲ ክልላት ክወጽ እንተመሪጹ፡ ነቲ ኣብ ኣዲስ ኣበባ ዘሎ ስርዓት ክሳብ ክንደይ ዝተዓጻጸፈ ብድሆ ከኸትለሉ ከምዝኾነ እዉን ብኣጋእኡ ይግመት ።